Soek die Vader se aangesig

Die tempel was op die berg. Die mense moes dus optrek en nader aan God beweeg. Dit het aksie van die mense vereis om nader aan God te kom.

“En baie volke sal heengaan en sê: Kom laat ons optrek na die berg van die Here, na die huis van die God van Jakob, dat Hy ons sy weë kan leer en ons in sy paaie kan wandel. Want uit Sion sal die wet uitgaan en die woord van die Here uit Jerusalem.”
‭‭JESAJA‬ ‭2:3‬ ‭AFR53‬‬

Mense sal weer optrek na die tempel in die Nuwe Jerusalem.

“EN aan die einde van die dae sal die berg van die huis van die Here vasstaan op die top van die berge en verhewe wees bo die heuwels, en die volke sal daarheen toestroom. En baie nasies sal heengaan en sê: Kom, laat ons optrek na die berg van die Here en na die huis van die God van Jakob, dat Hy ons in sy weë kan leer en ons in sy paaie kan wandel. Want uit Sion sal die wet uitgaan en die woord van die Here uit Jerusalem.”
‭‭MIGA‬ ‭4:1-2‬ ‭AFR53

God se heerlikheid het die tempel gevul. God se heerlikheid wil vandag steeds Sy tempels vul. Deur Jesus kan elke mens ‘n tempel van God word -  1 Korinthiërs 3:16-17, Johannes 14:23. Ons moet die Vader nader en tyd spandeer in Sy teenwoordigheid.

“STAAN op, word verlig; want jou lig kom, en die heerlikheid van die Here gaan oor jou op. Want kyk, die duisternis sal die aarde oordek en donkerheid die volke; maar oor jóú sal die Here opgaan, en sy heerlikheid sal oor jou gesien word.”
‭‭JESAJA‬ ‭60:1-2‬ ‭AFR53‬‬

Die tempel het uit verkillende dele bestaan - Exodus 40, 1 Konings 6-8, 2 Kronieke 3-7, Eségiël 40-43. Daar was ‘n voorhof met ‘n altaar waarop brandoffers en spysoffers gebrand is. Daar was ‘n waskom en later ‘n see waar die priesters hulle moes was voordat hulle kon ingaan na die Heilige en Allerheiligste areas. Binne die Heilige Area was daar tafels met 12 toonbrode en die goue kandelaar met 7 lampe - Númeri 8:1-4. Die 2 vertrekke waa geskei deur ‘n gordyn. Dit is hierdie gordyn/voorhangsel wat in 2 geskeur het toe Jesus gekruisig is - Matthéüs 27:51. Daar was ‘n reukaltaar voor die gordyn. Die verbondsark is binne die Allerheiligste geplaas. Dit is waar God se teenwoordigheid en heerlikheid gevind kon word. Die hoërpriester moes een keer ‘n jaar ingaan om versoening van sonde te doen namens al die mense - Exodus 30:10.  Jesus het ons laaste hoërpriester geword en daarom het almal nou vrye toegang tot die Allerheiligste - Hebreërs 8- 10. Elkeen van ons kan God se teenwoordigheid en heerlikheid ervaar.

Jesus het vir alles betaal om ons vrye toegang tot God te gee. MAAR die mate wat ons Jesus ervaar in ons lewens hang baie af van wat ons bereid is om op die altaar te plaas. Jy kan nie by die Allerheiligste uitkom as jy nie eers jou lewe op die altaar plaas nie. Jou wil, emosies en agendas moet almal op die altaar geplaas word sodat God se wil kan geskied in jou lewe. Die helde van geloof (Hebreërs 11) in die Bybel, maar ook daarna moes sekere dinge opoffer om ‘n intieme verhouding met God te hê en Sy heerlikheid te ervaar. A.A. Allen het hom laat toesluit in sy gebedskamer en soms net uitgekom om 1 skeppie kos te eet, totdat hy God se heerlikheid ervaar het.

Moses het God se aangesig gesoek en God het met hom gepraat soos met ‘n vriend. Moses het behoefte gehad vir meer van God en kon daarom Sy heerlikheid ervaar - Exodus 33:9-23. Moses se gesig het geblink nadat hy In God se teenwoordigheid was - Exodus 34: 30.

“Hy het aan Moses sy weë bekend gemaak, aan die kinders van Israel sy dade.”
‭‭PSALMS‬ ‭103:7‬ ‭AFR53‬‬

“Ja, tot vandag toe, wanneer Moses gelees word, lê daar 'n bedekking oor hulle hart; maar wanneer hulle tot die Here bekeer is, word die bedekking weggeneem. Die Here is die Gees, en waar die Gees van die Here is, daar is vryheid. En terwyl ons almal met onbedekte gesig soos in 'n spieël die heerlikheid van die Here aanskou, word ons van gedaante verander na dieselfde beeld, van heerlikheid tot heerlikheid, as deur die Here wat die Gees is.”
‭‭II KORINTHIËRS‬ ‭3:15-18‬ ‭AFR53‬‬

Die mate van intimiteit tussen jou en God word deur jou bepaal. God het behoefte aan ‘n intieme verhouding met elke mens wat Hy geskape het.